Umferðarlausnir á höfuðborgarsvæðinu tefjast um sjö ár að meðaltali
Konráð S. Guðjónsson hagfræðingur hefur vakið athygli á miklum töfum á samgönguúrbótum á höfuðborgarsvæðinu og þeim gríðarlega kostnaði sem þeim fylgir. Á ráðstefnunni „Greiðari leið – hugmyndir óskast!“ í síðustu viku, lagði hann fram mögulegar lausnir og ræddi um hvenær og hvernig umferðin gæti batnað.
Samkvæmt Konráð er svarið við því hvenær umferðin lagast einfalt: Það er enn talsvert langt í Það. Hann bendir á að umferðartafir kosti samfélagið um 100 milljarða króna árlega, sem undirstrikar mikilvægi þess að finna skjótar og skilvirkar lausnir. Hann segir að tafir á stórum samgönguverkefnum á höfuðborgarsvæðinu virðist vera hluti af víðtækari þróun sem sést einnig í uppbyggingu orkuinnviða.
Tafir og samanburður við stórverkefni
Konráð nefnir í færslu á Substack að verkefni samgöngusáttmálans hafi seinkað um að meðaltali sjö ár frá 2019 til 2024. Hann ber þetta saman við byggingu álversins í Straumsvík og Búrfellsvirkjunar, sem voru risastór verkefni á sínum tíma en kláruðust mun hraðar. „Það er með nokkrum ólíkindum hversu hratt tókst að klára þau verkefni í samanburði við að samgöngumál á höfuðborgarsvæðinu þokast, eins og sjálf umferðin, áfram á hraða snigilsins,“ skrifar hann.
Þótt samgöngusáttmálinn muni líklega skila ábata, telur Konráð að hætt sé við að sá ábati sé ofmetinn. Hann leggur því til að forgangsröðun og útfærsla verkefna verði reglulega endurskoðuð. Sem eina mögulega lausn nefnir hann einfalda umferðarstokka undir gatnamótum sem myndu liðka fyrir umferð án þess að taka auka pláss.
Sjá nánar: mbl.is
