Reir stofnar óhagnaðardrifið leigufélag með milljarðs króna stofnframlagi frá Reykjavíkurborg
Reir ehf., móðurfélag verktakafyrirtækisins Reir verks, undirbýr nú stofnun óhagnaðardrifins húsnæðisfélags undir merkjum Reir íbúðafélags. Reykjavíkurborg hefur samþykkt að veita hinu óstofnaða félagi stofnframlag upp á 984 milljónir króna vegna byggingar 120 íbúða á Stórhöfða. Þetta framlag samsvarar 12% af áætluðu stofnvirði verkefnisins, sem er um 8,2 milljarðar króna.
Félagið verður húsnæðissjálfseignarstofnun (hses.), en slíkum félögum er heimilt að fá stofnframlög frá Húsnæðis- og mannvirkjastofnun (HMS) og sveitarfélögum vegna byggingar eða kaupa á almennum íbúðum. Forsenda fyrir framlagi borgarinnar er að HMS veiti einnig stofnframlag ríkisins innan þriggja mánaða. Heildarstofnframlag ríkis og sveitarfélags getur orðið allt að 30% eða hærra.
Rannveig Eir Einarsdóttir, forstjóri og eigandi Reir verks, segir í samtali við Viðskiptablaðið að félagið telji mikilvægt að einkaaðilar taki virkan þátt í að byggja upp langtímalausnir á húsnæðismarkaði. Hún bendir á að rekstur leigufélagsins verði alveg aðskilinn byggingarverkefninu og að öll verð hafi verið yfirfarin og samþykkt af HMS til að tryggja gagnsæi og ábyrga nýtingu opinberra fjármuna.
Sjá nánar: vb.is
