Framkvæmdir við nýja jöfnunarstöð Strætisvagna Akureyrar hafnar

Framkvæmdir eru hafnar við nýja söfnunarstöð fyrir Strætisvagna Akureyrar við Borgarbraut, á móti Glerártorgi. Samhliða þessum framkvæmdum verður einnig byggð ný göngubrú yfir Glerá og lagðir nýir göngustígar, sem miða að því að bæta aðgengi og tengingar á svæðinu.

Söfnunarstöðin mun hýsa biðskýli, aðstöðu fyrir vagnstjóra, tæknirými og almenningssalerni. Gert er ráð fyrir að stöðin geti þjónað þremur innanbæjarstrætisvögnum og tveimur til þremur landsbyggðarvögnum samtímis.

Nýja göngubrúin yfir Glerá verður staðsett um 50 metrum ofan við núverandi vegbrú á Hörgárbraut, rétt við söfnunarstöðina. Með tilkomu brúarinnar og nýrra gönguleiða mun aðgengi milli Hlíðahverfis og verslunar- og þjónustusvæðis við Glerártorg batna verulega. Ný gangbraut með ljósastýringu verður sett upp við norðurinngang Glerártorgs og mun tengjast beint við göngubrúna.

Umhverfisbætur og útivistarsvæði

Einnig verður lagður göngustígur frá söfnunarstöðinni að Gefjunarstíflu, meðfram Glerá. Á þessu svæði er gert ráð fyrir tjörnum og leiksvæði í fallegu umhverfi, sem mun auka útivistarmöguleika íbúa.

Höskuldur R. Höskuldsson, verkefnastjóri nýframkvæmda hjá umhverfis- og mannvirkjasviði Akureyrarbæjar, segir að markmið framkvæmdanna sé að styrkja tengingar á svæðinu og bæta aðgengi fyrir gangandi og hjólandi vegfarendur. Áætlað er að framkvæmdum ljúki um mitt sumar 2027.

Sjá nánar: akureyri.is