Vindmyllur á Héraði í rammaáætlun
Áform Orkusölunnar um að reisa tvær allt að 160 metra háar vindmyllur við Lagarfossvirkjun á Héraði hafa mætt mótspyrnu í nærsamfélaginu. Heimastjórn leggst gegn framkvæmdinni og landeigendur safna undirskriftum til að hvetja Múlaþing til að hafna umsókninni.
Orkusalan hefur lagt fram áform um að reisa tvær vindmyllur, allt að 160 metra háar, við Lagarfossvirkjun á Héraði. Umsagnarfrestur vegna mats á umhverfisáhrifum fyrirhugaðrar framkvæmdar rann út fyrir helgi. Áformin hafa hins vegar vakið sterk viðbrögð í nærsamfélaginu og leggst heimastjórn gegn þeim. Landeigendur í grennd við fyrirhugaðar vindmyllur hafa hafið undirskriftarsöfnun til að hvetja sveitarfélagið Múlaþing til að hafna umsókn Orkusölunnar.
Helga Rún Steinarsdóttir, sauðfjárbóndi á Kirkjubæ, sem býr í rúmlega tveggja kílómetra fjarlægð frá Lagarfossvirkjun, stofnaði undirskriftalistann. „Ég vil vera tilbúin með skýra afstöðu þeirra sem búa hérna og nærsamfélagsins þegar Múlaþing fer að taka þetta til sín,“ segir hún. Upphaflega stóð til að reisa vindmyllur á Héraðssandi en þau áform fengu ekki grænt ljós hjá Fljótsdalshéraði, sem síðar sameinaðist öðrum sveitarfélögum í Múlaþing. Orkusalan lagði þá til að myllurnar yrðu reistar á iðnaðarlóð fyrirtækisins við Lagarfossvirkjun.
Kristjana Júníusdóttir, ferðaþjónustubóndi á Ekru, sem er tæpum tveimur kílómetrum frá virkjuninni, bendir á að það sé óeðlilegt að á iðnaðarlóð séu ekki jafn strangar kröfur, sérstaklega þegar hún er umkringd landbúnaðarlandi. „Það liggur alveg ljóst fyrir, okkur finnst það alveg galið að setja þetta ofan í landbúnaðarland sem á að njóta þess að vera það sem það er,“ segir Kristjana. Hún rekur ferðaþjónustu og selur meðal annars gistingu í sumarhúsum sem eru aðeins um hálfur kílómetri frá virkjunarstað. „Það næði og sá friður og sú náttúruumgjörð sem á að vera í kringum mín hús sé bara einskis virði þegar peningar eru annars vegar.“
Heimild: RÚV