Viðhaldsframkvæmdir víða í Fjarðabyggð

Fjarðabyggð hefur nokkur viðhalds- og endurbótaverkefni í gangi við fasteignir og mannvirki sveitarfélagsins. Þar á meðal eru framkvæmdir við Breiðdalsskóla, leikskólann Dalborg og íþróttamiðstöðina á Eskifirði, Grunnskóla Reyðarfjarðar og Stríðsárasafnið á Reyðarfirði.

Endurnýjun á þaki Breiðdalsskóla er langt komin með nýjum þakpappa og beðið er eftir fjórum glerkúplum til að ljúka verkinu. Þá verður hafist handa við endurnýjun turnsins og innandyra er gert ráð fyrir að framkvæmdum verði lokið á næstu þremur vikum.

Á Eskifirði hafa endurbætur á eldri hluta Dalborgar tafist lítillega en stefnt er að verklokum um mánaðamót ágúst og september. Þar er meðal annars verið að leggja nýtt gólfefni og hitalagnir í gólf, endurnýja og stækka eldhús, auk þess að setja upp nýtt kerfisloft og loftræstingu.

Við Grunnskóla Reyðarfjarðar hefur verið unnið að klæðningu á húsnæðinu og er stefnt að verklokum 25. ágúst, en sérstaklega hefur verið unnið að endurklæðningu á B-álmu skólans.

Framkvæmdir við Stríðsárasafnið á Reyðarfirði halda áfram, en nú er unnið að því að reisa braggann og er gert ráð fyrir að því verki ljúki um 10. september. Í kjölfarið verður hafist handa við þak á þjónustubyggingunni. Einnig er stefnt að því að hefja fljótlega gröft fyrir nýju bílahúsi og koma húsinu upp fyrir áramót. Húsið hefur þegar verið pantað og er von á því til landsins í byrjun nóvember, en framkvæmdir innandyra hefjast í nóvember og ljúka á vormánuðum.

Í ágúst verður sundlaugardúkurinn í sundlauginni á Eskifirði endurnýjaður, en sú vinna hefst 20. ágúst og lýkur 26. ágúst. Fram að því hefur verið unnið að hreinsun á botni laugarinnar og almennu viðhaldi. Samhliða því er unnið að endurbótum á kvennaklefa, meðal annars lagfæringum á fúgum, auk þess sem aðstaða fyrir fatlað fólk verður bætt.

→ Lesa upprunaleg frétt á vef Fjarðabyggð

Heimild: Fjarðabyggð