Verkalýðsfélagið Hlíf fær lyklana að Strandgötu 1

Verkalýðsfélagið Hlíf hefur formlega tekið við lyklunum að húsnæði við Strandgötu 1 í Hafnarfirði, sem áður hýsti bókasafn bæjarins. Framkvæmdir við endurhönnun og uppbyggingu hússins og nærliggjandi reits eru nú hafnar. Stefnt er að því að félagið geti flutt starfsemi sína í nýtt húsnæði fyrir 120 ára afmæli sitt í byrjun næsta árs.

Guðmundur Rúnar Árnason, framkvæmdastjóri Hlífar, tók við lyklunum og er starf við endurhönnun hússins þegar hafið. Miklar breytingar eru fyrirhugaðar á reitnum við Strandgötu 1, þar sem Ráðhústorgið mun einnig fá upplyftingu samhliða uppbyggingu Hlífar. Félagið vinnur með Plús Arkitektum að breytingunum, sem fela í sér uppbyggingu sex íbúða. Tveimur íbúðum verður komið fyrir á efstu hæð Strandgötu 1, tveimur á Austurgötu 4 og tveimur á Austurgötu 6. Á jarðhæð Austurgötuhúsanna, sem snúa að Strandgötu, verða verslanir og þjónusturými.

Hlíf mun nýta tvær hæðir og kjallara í gamla bókasafninu undir starfsemi sína. Meginstarfsemi félagsins, þar á meðal afgreiðsla, skrifstofur og viðtalsrými, verður á jarðhæð og millihæð. Á annarri hæðinni verður vinnurými fyrir starfsfólk sem ekki er í daglegri móttöku félagsmanna, auk rýmis til náms.

→ Lesa upprunaleg frétt á vef Hafnarfjarðarkaupstaður

Heimild: Hafnarfjarðarkaupstaður