Múlaþing óskar eftir tilboðum í verkið: Skólavegur 1 – stækkun Grunnskóla Seyðisfjarðar
Múlaþing hefur hafið útboð vegna stækkunar Grunnskóla Seyðisfjarðar við Skólaveg 1. Verkið felur í sér viðbyggingar til norðurs og suðurs, auk tengibygginga, og er áætlað að ljúka því fyrir 15. júlí 2028.
Múlaþing hefur hafið útboð vegna framkvæmda við Grunnskóla Seyðisfjarðar á Skólavegi 1. Verkið felst í stækkun skólans í tveimur áföngum. Annars vegar verður byggð viðbygging til norðurs í sama stíl og núverandi skólahús, auk tengibyggingar við íþróttahús. Hins vegar verður byggð tengibygging til suðurs við nýbyggingu.
Gert er ráð fyrir að byggingin verði með steyptum undirstöðum, plötu og veggjum, með stálbitum og súlum og timburþakvirki. Samtals verður gólfflötur stækkunarinnar um 830 fermetrar. Framkvæmdirnar ná yfir jarðvinnu, uppsteypu, fullnaðarfrágang að utan og innan, ásamt lóðafrágangi. Verkkaupi leggur áherslu á vandaða umgengni um framkvæmdasvæðið á meðan á verktíma stendur.
Verkið getur hafist strax eftir undirritun samnings og skal að fullu lokið fyrir 15. júlí 2028. Meðal magntalna í útboðinu eru um 2.150 rúmmetrar af uppgröfnu efni, 2.766 fermetrar af mótasmíði, 450 rúmmetrar af steinsteypu og 830 fermetrar af þakfrágangi. Útboðsgögn verða afhent rafrænt frá og með 15. júní 2026 og skulu tilboðum skilað á skrifstofu Múlaþings á Lyngási 12 á Egilsstöðum fyrir klukkan 14 fimmtudaginn 23. júlí 2026.
Heimild: Útboðsvefur.is