Fossvogsblettur – Lóðarframkvæmd, útboð nr. 16356
Umhverfis- og skipulagssvið Reykjavíkurborgar hefur óskað eftir tilboðum í lóðarframkvæmdir við nýjan tíu deilda leikskóla við Fossvogsblett 2 ásamt lagningu göngustígs. Leikskólalóðin er um 4.870 fermetrar og verður lögð áhersla á að varðveita trjágróður og skapa náttúrulegt yfirbragð.
Umhverfis- og skipulagssvið Reykjavíkurborgar óskar eftir tilboðum í lóðarframkvæmdir við nýjan tíu deilda leikskóla við Fossvogsblett 2. Verkið felur einnig í sér lagningu á 85 metra löngum göngustíg á milli Fossvogsvegar og Fossvogsstígs.
Sjálf leikskólabyggingin er 2.185 fermetrar að stærð en umhverfis hana er um 4.870 fermetra lóð. Lögð er áhersla á að varðveita ríkjandi trjágróður og skapa náttúrulegt yfirbragð með sterkri skógartengingu. Skipulag lóðarinnar gerir ráð fyrir leikbúnaði úr timbri og harðari yfirborðsefnum næst byggingunni, þar á meðal leikkofum, sandkössum og rólum.
Svæðið verður náttúrulegra og að hluta óhreyft fjær húsinu, en inni í skóginum verður útikennslusvæði með bálstæði. Við austurhlið leikskólans verða tveir minni garðar sem tengjast smiðjum innandyra. Verkefnið felur jafnframt í sér malbikun á 630 fermetra bílastæði og tengingu lóðarinnar við Fossvogsveg um tvær nýjar innkeyrslur.
Tilboðsfrestur í verkið rennur út klukkan 10:00 þann 27. nóvember 2026.
Heimild: Útboðsvefur.is