Undirbúa fyrstu jarðhitaboranir á Borgarfirði í 50 ár

Fyrstu tilraunaboranir eftir jarðhita á Borgarfirði eystra í um fimmtíu ár hefjast á næstu vikum. Stefnt er að því að bora fimm til sex holur í og við þorpið til að kanna möguleika á nýtingu jarðhita.

Aðeins ein slík tilraunaborun hefur verið gerð í Borgarfirði áður, fyrir um hálfri öld, sem ekkert leiddi í ljós. Verkefnið er fjármagnað með styrk úr Orkusjóði sem fékkst síðasta haust.

Glúmur Björnsson, jarðfræðingur hjá HEF-veitum, segir að tilgangur borananna sé að komast að því hvort nægur jarðhiti finnist til að réttlæta frekari boranir. Ein holustaðsetningin verður við hlið Sparkhallarinnar, rétt hjá félagsheimilinu Fjarðarborg og leikskóla þorpsins. Þar er ætlunin að kanna hitastigulinn og mögulega nýta holuna sem varmadæluholu fyrir félagsheimilið. Borun á þeim stað ætti ekki að taka lengri tíma en tvo til þrjá daga og leitast verður við að lágmarka rask og hávaða.

Hinar holurnar verða boraðar á Hofströnd, Gilsárvöllum, við Desjamýri, Jökulsá og Skriðuból. Borað verður frá 60 til 150 metra niður á hverjum stað. Engin mannvirki verða reist eða slóðar útbúnir vegna borananna. Boranir hefjast um leið og bor kemst á staðinn.

→ Lesa upprunaleg frétt á vef Austurfrétt

Heimild: Austurfrétt