Tugir lóða í boði og milljarðafjárfestingar í skólum og fráveitu

Mikil uppbygging er framundan í Reykjanesbæ þar sem sveitarfélagið býður upp á tugi byggingarlóða fyrir atvinnustarfsemi og íbúðarhúsnæði. Þessu fylgja milljarðafjárfestingar í skólum og fráveitukerfi.

Guðlaugur Helgi Sigurjónsson, sviðsstjóri umhverfis- og framkvæmdasviðs Reykjanesbæjar, kynnti þessi umfangsmiklu áform á Atvinnu- og framkvæmdaþinginu í Hljómahöll. Í dag eru 36 atvinnuhúsalóðir tilbúnar til úthlutunar og 20 til viðbótar í undirbúningi. Þar af eru 16 stórar lóðir í Helguvík ásamt fimm hektara landi við gamla kísilverið sem býður upp á ýmsa möguleika. Einnig eru 41 sérbýlishúsalóð laus til úthlutunar og ný svæði í deiliskipulagi.

Umfangsmikil íbúðauppbygging er fyrirhuguð í Keflavíkurborg, nýju byggingarsvæði nyrst í Keflavík, sem nær yfir 25 hektara svæði. Jafnframt er unnið að uppbyggingu við Trölladal og Asparlaut fyrir par- og einbýlishús, auk Dalshverfis 3 þar sem 20 raðhús munu rísa. Viljayfirlýsing hefur verið undirrituð um Suðurbrekku, einnig þekkt sem Brekkubyggð, sem gerir ráð fyrir byggingu 144 til 219 íbúða.

Samhliða íbúðauppbyggingunni er mikið lagt í mennta- og frístundainnviði. Endurbætur og stækkanir standa yfir á Myllubakkaskóla, með áætluðum verklokum á árunum 2027–2028, og á Holtaskóla til loka árs 2027. Viljayfirlýsing hefur verið undirrituð um viðbyggingu við Fjölbrautaskóla Suðurnesja og unnið er að lokastigi Stapaskóla þar sem 120 barna leikskóli rís.

Fram undan eru einnig milljarðaframkvæmdir í fráveitumálum, þar á meðal ný hreinsunarstöð, Helga, í Helguvík. Hugmyndir eru um nýtt fimleikahús og leikskóla til að mæta þéttingu byggðar. Guðlaugur Helgi benti á að sveitarfélagið væri opið fyrir fjölbreyttum leiðum við fjármögnun framkvæmda, svo sem einkaframkvæmd eða leiguleiðum, til að flýta fyrir framþróun á svæðinu.

→ Lesa upprunaleg frétt á vef Víkurfréttir

Heimild: Víkurfréttir