Tugi milljóna kostar að lagfæra orgelið

Ástand pípuorgelsins í Akureyrarkirkju er verra en áður var talið og mun nauðsynlegt viðhald hlaupa á tugum milljóna króna, samkvæmt skoðun erlendra sérfræðinga. Hjörtur Narfason, formaður Sóknarnefndar Akureyrarkirkju, býst við að ítarlegri greining á ástandi og viðgerðarkostnaði liggi fyrir innan fárra vikna.

Orgelið var byggt árið 1961 og endurbyggt árið 1995. Þar sem eini innlendi orgelsmiðurinn hættir um næstu áramót og er fullbókaður fram að því, þarf að fá erlenda orgelsmiði til að yfirfara og gera við orgelið. Viðhald á pípuorgeli er sérstakt handverk sem krefst mikillar nákvæmni og reynslu, enda er orgelið samsett úr þúsundum einstakra hluta.

Viðhald orgelsins er einn af nokkrum stórum viðhaldsþáttum sem sóknarnefndin stendur frammi fyrir. Nýlega lauk viðamikilli viðgerð á þaki safnaðarheimilisins og næst er áætlað að endurnýja eldhúsið þar. Fleiri kostnaðarsamar framkvæmdir eru nauðsynlegar, þar á meðal endurnýjun kirkjugólfs og lagfæring á utanhússklæðningu. Akureyrarkirkja var vígð árið 1940 og styttist því í 100 ára afmæli hennar. Sóknarnefndin samþykkti í fyrra 15 ára viðhalds- og endurbótaáætlun, sem miðar að því að kirkjan verði í sínu besta standi á afmælinu. Styrktarfélagið Vinir Akureyrarkirkju hefur verið stofnað til að styðja við þessar endurbætur og vinna að fjáröflun.

→ Lesa upprunaleg frétt á vef Akureyri.net

Heimild: Akureyri.net