„Þegar Metallica eða Rammstein hringir hendum við okkur í gírinn“
Heimskautsgerðið á Melrakkaási nálægt Raufarhöfn hefur verið í smíðum frá árinu 2004 og sækir innblástur í norræna goðafræði og stjörnufræði. Verkefnið, sem að mestu er fjármagnað af ríkinu, stendur frammi fyrir óvissu um frekari fjármögnun til að ljúka við það.
Bygging Heimskautsgerðisins á Melrakkaási, norðvestan við Raufarhöfn, hófst árið 2004. Verkið er steinsteypt listaverk sem sækir innblástur í norræna goðafræði og stjörnufræði. Framkvæmdin hefur að mestu verið fjármögnuð af ríkinu, einkum með styrkjum úr Framkvæmdasjóði ferðamannastaða. Skúlptúrinn Altari elds og vatns var settur upp á síðasta ári.
Nanna Steina Höskuldsdóttir, stjórnarformaður Heimskautsgerðisins, greinir frá því að fyrsti af fjórum miðjuskúlptúrum hafi verið kláraður síðastliðið haust. Pólstjörnubendirinn, Hásæti sólar og Geislakór eiga eftir að koma á sinn stað.
Óvissa ríkir um framhald fjármögnunar verkefnisins. Talið er að um 100 milljónir króna vanti til að ljúka við gerðið og óvíst er hvenær framkvæmdir hefjast á nýjan leik. Engu að síður laðar Heimskautsgerðið þúsundir gesta til Raufarhafnar ár hvert. „Þetta er búið að taka tæp 20 ár að byggjast upp. Heimskautsgerðið er bara mjög flottur viðkomustaður í dag þótt það sé ekki alveg tilbúið. Við erum að fá á bilinu 22-25 þúsund gesti á ári og það er ekkert stress. Þetta er byggt til að endast í þúsund ár, þetta bara kemur smátt og smátt,“ segir Nanna.
Hugmyndir hafa komið fram um stórtónleika undir berum himni á svæðinu, svipað og Kaleo hélt á Þingvöllum. Skálmöld hélt útitónleika í gerðinu með góðum árangri, en yfir 1600 manns sóttu viðburðinn. „Það væri ofboðslega gaman, það var hrikalega skemmtilegt þegar Skálmöld spilaði hjá okkur. Fengum geggjað veður og gekk allt upp. En mín persónulega skoðun er að þetta megi ekki alveg vera árlegt en já, já þegar að Metallica eða Rammstein hringir þá hendum við okkur í gírinn,“ segir Nanna.
Heimild: RÚV