Góðar fréttir af Hólum í Hjaltadal

Samkomulag hefur verið undirritað milli Skagafjarðar og íslenska ríkisins um að sveitarfélagið taki yfir rekstur innviða, umhirðu og staðarhald á Hólum í Hjaltadal. Samningurinn var undirritaður þann 13. maí 2026 af Sigfúsi Inga Sigfússyni sveitarstjóra fyrir hönd Skagafjarðar, og forsætisráðherra og fjármálaráðherra fyrir hönd íslenska ríkisins. Markmið samkomulagsins er að tryggja að rekstur innviða og þjónusta á Hólum verði í samræmi við þær kröfur sem gerðar eru til annarra þéttbýlisstaða í Skagafirði.

Samkvæmt samkomulaginu tekur sveitarfélagið yfir rekstur, viðhald og uppbyggingu allra helstu innviða innan afmarkaðs þéttbýlissvæðis á Hólum. Þetta felur í sér veitukerfi, götur, lóðir og almenna umhirðu. Sérstök áhersla er lögð á úrbætur í fráveitumálum, en fyrir liggur að ráðast þarf í umfangsmiklar endurbætur á núverandi kerfi. Skagafjörður skuldbindur sig til að hefja þær framkvæmdir innan eins árs frá undirritun samkomulagsins og ljúka þeim innan fimm ára.

Samkomulagið felur jafnframt í sér að ríkissjóður afsalar til sveitarfélagsins eignarhaldi á afmörkuðu svæði sem nær til stærsta hluta þéttbýlisins á Hólum. Þetta svæði inniheldur einnig land sem ætlað er til frekari þróunar íbúðabyggðar. Með þessu skapast aukin tækifæri til uppbyggingar og þróunar byggðar á svæðinu.

Til viðbótar við landspilduna í þéttbýlinu á Hólum, leggur ríkissjóður Skagafirði til 150 milljóna króna eingreiðslu. Sveitarfélagið fær einnig til eignar 26 hektara landspildu við Nýrækt í Fljótum, sem Skagafjörður hyggst nýta til íbúðauppbyggingar. Sá hluti lands sem fer undir breytta legu Siglufjarðarvegar vegna fyrirhugaðra Fljótaganga er undanskilinn þessu samkomulagi.

→ Lesa upprunaleg frétt á vef Feykir

Heimild: Feykir