Fjölorkustöð og lágvöruverslun í Húnabyggð

Framkvæmdir við fjölorkustöð og lágvöruverslun á lóð Dranga við Svínvetningabraut í Húnabyggð eru að færast í næsta fasa eftir umfangsmikla undirbúnings- og hönnunarvinnu. Á stöðufundi Húnabyggðar og Dranga í vikunni kom fram að hönnunarvinnan sé á góðum stað og verkefnið sé nú að fara í meiri smáatriði og útfærslur arkitekta á byggingum og innviðum.

Auður Daníelsdóttir, forstjóri Dranga, lýsir verkefninu sem flóknu þar sem það þurfi að falla að skipulagi svæðisins og mæta kröfum Vegagerðarinnar og sveitarfélagsins um útlit og hönnun. Hún gerir ráð fyrir að hönnunarvinnu ljúki með haustinu og þá hefjist framkvæmdafasi. Áfangaskipting framkvæmda verður ákveðin þegar hönnun og fjárhagsáætlanir liggja fyrir.

Oddur Víðisson arkitekt segir að undanfarna mánuði hafi verið unnið að heildarútliti verkefnisins, staðsetningu bygginga og innviða. Skipulagsvinna Húnabyggðar og kröfur Vegagerðarinnar um vegtengingar hafa haft áhrif á hönnunina. Nú er unnið að innri hönnun, tæknilegum útfærslum og frekari smáatriðum. Heildar byggingarmagn er áætlað um 2.000 fermetrar og vinnan mun taka nokkra mánuði í viðbót.

→ Lesa upprunaleg frétt á vef Húnabyggð

Heimild: Húnabyggð