Steypu nýrrar vegbrúar austan við Selfoss lokið
Steypu nýrrar vegbrúar austan við Selfoss er lokið og samsetning stálbita nýrrar Ölfusárbrúar er á áætlun.
Allir stálbitar í brúargrind nýrrar Ölfusárbrúar hafa verið fluttir til landsins og er unnið að samsetningu þeirra austan árinnar. Tengingar eru rafsoðnar og að því loknu er yfirborðið sandblásið, galvaniserað og málað. Samhliða samsetningu stálbitanna er unnið að frágangi lagnakerfis í brúargrindinni.
Búið er að steypa undirstöður landstöpla Ölfusárbrúar og unnið er við uppslátt stöplanna. Í Efri-Laugardælaeyju hefur neðri hluti undirstaða brúarturnsins verið steyptur og nú er unnið að uppslætti og járnbendingu fyrir efri hluta þeirra. Áætlað er að stálið í brúarturninn verði flutt til landsins í ágúst.
Austan við Selfoss er unnið að byggingu vegbrúar yfir nýjan hluta Hringvegar. Uppsteypu brúarinnar er lokið og nú er unnið að gerð sigplatna og frágangi. Jarðvegsskipti og gerð lagnaskurða austan Ölfusár eru komin vel á veg og stefnt er að því að hefja fljótlega útlögn styrktar- og burðarlaga undir malbik. Vestan Ölfusár er áfram unnið að fergingu vegstæðisins í Hellismýri og við skeringar í vegstæði, jarðvinnu fyrir undirgöng undir Hringveg við Einholtsveg, gröft lagnaskurða og tilfærslu lagna veitustofnana. Um 65 starfsmenn vinna nú á framkvæmdasvæðinu. Áætlað er að brúin verði tilbúin haustið 2028.
Heimild: vegagerdin.is