Skráningarskylda leigusamninga vanvirt – HMS tilbúið að sekta

Húsnæðis- og mannvirkjastofnun (HMS) mun beita sektarheimildum sínum gegn leigusölum sem ekki skrá leigusamninga, en skráningarskylda tók gildi um síðustu áramót. Þetta kemur fram í nýrri mánaðarskýrslu stofnunarinnar þar sem bent er á að færri nýir leigusamningar hafi tekið gildi á þessu ári samanborið við það síðasta, þrátt fyrir skráningarskylduna.

Jónas Atli Gunnarsson, yfirhagfræðingur HMS, segir í skýrslunni að þetta bendi til þess að fjöldi heimila kjósi að skrá ekki leigusamninga. Stofnunin mun fylgjast náið með þróuninni og er tilbúin að grípa til aðgerða. „Við hyggjumst beita þessum heimildum þegar við sjáum dæmi um að þessu sé ekki fylgt eftir,“ segir Jónas.

Í skýrslunni kemur einnig fram að væntingar um hraða lækkun vaxta séu litlar og að áhrif vaxtahækkana undanfarinna mánaða séu ekki að fullu komin fram á fasteignamarkaði.

Sjá nánar: visir.is