Samgönguáætlun samþykkt
Alþingi hefur samþykkt nýja samgönguáætlun fyrir árin 2026 til 2040, með fimm ára aðgerðaáætlun fyrir tímabilið 2026 til 2030. Áætlunin felur í sér aukna fjármögnun til vegaviðhalds, upphaf stórframkvæmda og ný jarðgöng.
Samgönguáætlun ríkisstjórnarinnar fyrir árin 2026 til 2040, ásamt fimm ára aðgerðaáætlun fyrir tímabilið 2026 til 2030, var samþykkt á Alþingi í dag. Meirihlutinn greiddi 33 atkvæði með áætluninni, en 23 þingmenn sátu hjá og sjö voru fjarstaddir.
Meginmarkmið nýrrar samgönguáætlunar er að auka framlög til viðhalds vega, hefja stórframkvæmdir og bora jarðgöng á ný. Í forgangi eru Fljótagöng, en þar á eftir koma Fjarðargöng, Súðavíkurgöng og Miklidalur og Hálfdán í Vesturbyggð. Stefnt er að því að hefja framkvæmdir við Fljótagöng árið 2027. Framlög til vegaviðhalds landsins munu aukast verulega, úr um 12-13 milljörðum króna á ári í 17,5 milljarða strax á þessu ári. Einnig verður veitt meira fé til vetrarþjónustu.
Áfram verður unnið að því að fækka einbreiðum brúm á Hringveginum og stefnt er að því að útrýma þeim á gildistíma samgönguáætlunarinnar. Eyjólfur Ármannsson innviðaráðherra segir að áætlunin rjúfi kyrrstöðu síðustu ára og að nýtt innviðafélag í eigu ríkisins muni hraða framvindu og fjármögnun þjóðhagslega mikilvægra samgöngumannvirkja, þar á meðal jarðganga. Hann segir nýju samgönguáætlunina marka þáttaskil og risavaxið skref fram á við fyrir samgöngur á Íslandi.
Í dag lauk annarri umræðu um innviðafélag, en málið var vísað til fjárlaganefndar. Síðari umræða um fjármálaáætlun 2027 til 2031 stendur enn yfir á Alþingi. Samkvæmt heimildum fréttastofu hefur náðst samkomulag um þinglok, en nánari útfærsla er óviss og óljóst hvaða mál verða afgreidd fyrir sumarfrí.
Heimild: RÚV