Reitir og Hjallastefnan sameinast um nýjan leik- og grunnskóla við Nauthólsveg

Reitir og Hjallastefnan hafa undirritað viljayfirlýsingu um samstarf vegna þróunar og uppbyggingar nýs leik- og grunnskóla í fyrirhuguðum lífsgæðakjarna við Nauthólsveg í Reykjavík. Áætlað er að skólinn muni hýsa um 400 börn í leikskóla og í grunnskóla frá fyrsta til sjöunda bekkjar. Þetta samstarf markar tímamót fyrir Hjallastefnuna í Reykjavík, sem hefur staðið frammi fyrir húsnæðisóvissu um nokkurt skeið.

Frá því að fyrstu nemendur hófu nám í grunnskóla Hjallastefnunnar árið 2006 var starfsemin lengst af við Nauthólsveg 89. Skólinn þurfti að víkja þegar Háskólinn í Reykjavík hóf uppbyggingu á sinni lóð. Síðan hefur skólinn starfað í tímabundnu húsnæði við Skógarhlíð og í Háuhlíð í húsnæði skátafélagsins Landnema, en í dag eru nemendur á miðstigi í Arnarhlíð 1. Skóla- og frístundasvið Reykjavíkurborgar hefur veitt verkefninu stuðning.

Nýi skólinn verður hluti af stærri uppbyggingu lífsgæðakjarna sem Reitir hyggjast reisa við Nauthólsveg. Þar er gert ráð fyrir fjölbreyttri byggð, þar á meðal um 150 íbúðum, einkum fyrir íbúa 60 ára og eldri, auk verslunar, þjónustu, hjúkrunarheimilis og sameiginlegra rýma. Hugmyndafræðin að baki verkefninu sækir innblástur til þveraldursbúsetu, þar sem mismunandi aldurshópar búa og starfa saman. Markmiðið er að stuðla að aukinni félagslegri virkni og vellíðan íbúa með samnýtingu rýma, góðum tengingum og aðlaðandi útisvæðum, þar á meðal görðum og torgum.

→ Lesa upprunaleg frétt á vef Reykjavíkurborg

Heimild: Reykjavíkurborg