Reitir valdir til að reisa 8,9 milljarða hjúkrunarheimili á Akureyri
Framkvæmdasýslan – Ríkiseignir valdi tilboð Reita hagstæðast í nýtt 9.100 fermetra hjúkrunarheimili við Þursaholt á Akureyri.
Tilboð Reita í uppbyggingu nýs hjúkrunarheimilis á Akureyri hefur verið valið hagstæðast af Framkvæmdasýslunni – Ríkiseignum (FSRE) í nýloknu útboði. Áætlaður framkvæmdakostnaður nemur um 8,9 milljörðum króna.
Hjúkrunarheimilið rís við Þursaholt 6, verður um 9.100 fermetrar og mun rúma 140 íbúa. Alls bárust tíu tilboð frá fimm aðilum og var tilboð Reita metið hagstæðast samkvæmt valforsendum útboðsins.
Að framkvæmdum loknum tekur við verðtryggður leigusamningur milli Reita og Ríkiseigna til 25 ára. Reitir annast rekstur húsnæðisins en Ríkiseignir fela öðrum rekstur sjálfs hjúkrunarheimilisins. Leigutilboð Reita nemur 5.800 krónum á fermetra, eða um 633 milljónum króna á ári.
Heimilið verður byggt með samblandi af forsmíðuðum og forsteyptum einingum, og ráðast Reitir í hönnun og framkvæmdir í samstarfi við Art-Verk ehf. Þessi byggingaraðferð á að stytta framkvæmdatíma, auka sveigjanleika í hönnun og tryggja gæði húsnæðisins.
„Öldrun þjóðar kallar á stórtæka aukningu hjúkrunarheimila víðs vegar um land,“ segir Guðni Aðalsteinsson, forstjóri Reita. Félagið hóf að horfa til hjúkrunarheimila með nýrri vaxtarstefnu árið 2024 og samdi í fyrra við Ríkiseignir um hjúkrunarheimili á Nauthólsvegi 50 í Reykjavík.