Platan steypt: Björgunarmiðstöðin á Borg tekur á sig mynd

Gólfplata nýrrar björgunarmiðstöðvar á Borg var steypt laugardaginn 26. september. Þetta er stór áfangi í byggingu hússins sem hefur gengið vel frá því að fyrsta skóflustungan var tekin 12. mars síðastliðinn.

Nú er von á límtré frá Límtré Vírneti á næstu dögum til að hefja reisn burðarvirkis hússins. Eftir skóflustunguna var verkið boðið út og bárust alls ellefu tilboð. Verksamningur var undirritaður við HR smíði 9. júní, og síðan þá hefur verið unnið að jarðvinnu, sökklum og nú síðast gólfplötunni.

Næsta skref í framkvæmdunum er að reisa burðarvirki hússins, sem verður límtrésgrind klædd stálklæddum steinullareiningum. Björgunarmiðstöðin er sameiginlegt verkefni Grímsnes- og Grafningshrepps, Brunavarna Árnessýslu og Hjálparsveitarinnar Tintron.

Hjálparsveitin Tintron mun nýta um 60% af húsnæðinu, en Brunavarnir Árnessýslu munu nýta um 40%. Með tilkomu miðstöðvarinnar rís í fyrsta sinn slökkvistöð á Borg, sem mun stytta viðbragðstíma og auka öryggi íbúa, sumarhúsaeigenda og ferðamanna á svæðinu. Jafnframt fær Tintron aðstöðu sem gerir sveitinni kleift að vaxa í takt við samfélagið.

Áætluð verklok eru í desember 2026.

→ Lesa upprunaleg frétt á vef Grímnes- og Grafningshreppur

Heimild: Grímnes- og Grafningshreppur