Nýtt hringtorg á að rísa hratt við Akrafjallsveg

Bæjarráð Akraness hefur samþykkt að Vegagerðin gangi til samninga við Borgarverk ehf. um byggingu nýs hringtorgs við Akrafjallsveg. Verkið er stórt og er í samstarfi Vegagerðarinnar og Akraneskaupstaðar.

Borgarverk ehf. bauð lægst í verkið, eða rúmlega 527 milljónir króna, sem samsvarar 85,5% af áætluðum kostnaði sem var rétt tæplega 617 milljónir króna. Hitt tilboðið kom frá Þrótti ehf. á Akranesi, sem bauð rétt rúmlega 594 milljónir króna, eða 96,3% af kostnaðaráætlun.

Verklok eru áætluð í nóvember á næsta ári. Akraneskaupstaður mun greiða um 22% af heildarkostnaði framkvæmdarinnar.

Hringtorgið mun tengja saman Akrafjallsveg og Akranesveg, auk þess að skapa nýja tengingu við Skógarhverfi um Lækjarskóga. Framkvæmdin felur í sér gerð hringtorgs, staðsteypt undirgöng undir Akrafjallsveg og stígagerð að undirgöngunum.

Einnig verður ráðist í lagningu vatns- og hitaveitulagna, annarra fjarskiptalagna og rafstrengja, ásamt færslu núverandi háspennustrengja. Í verkinu er innifalin gerð fyllinga og fergingar, útlögn styrktar- og burðarlags, malbikun, niðurlögn ræsa og uppsetning vegriða.

Þá verður settur upp lýsingarbúnaður, skilti og annar vegbúnaður, auk yfirborðsmerkinga.

→ Lesa upprunaleg frétt á vef Skagafréttir

Heimild: Skagafréttir