Nýtt fjölbýlishús í Starengi samþykkt þrátt fyrir andstöðu íbúa
Umhverfis- og skipulagsráð Reykjavíkurborgar hefur samþykkt breytingar á deiliskipulagi í Grafarvogi sem heimila byggingu fjölbýlishúss á nýrri lóð í Starengi. Tillagan gerir ráð fyrir allt að 18 íbúðum í tveggja til fjögurra hæða húsi, ásamt nægum bílastæðum fyrir íbúa og gesti. Málinu hefur verið vísað til borgarráðs til endanlegrar afgreiðslu.
Í kynningu með breytingunum kemur fram að tillagan sé í samræmi við stefnu Reykjavíkurborgar um hóflega íbúðauppbyggingu á vannýttum svæðum innan gróinna hverfa. Markmiðið er að nýta betur fyrirliggjandi innviði og þjónustu. Tillagan var samþykkt með fimm atkvæðum fulltrúa Samfylkingarinnar, Pírata, Sósíalistaflokksins, Vinstri grænna og Viðreisnar.
Andstaða Sjálfstæðisflokksins og áhyggjur íbúa
Sjálfstæðisflokkurinn greiddi atkvæði gegn breytingunum og Framsóknarflokkurinn sat hjá. Borgarfulltrúi Sjálfstæðisflokksins lagði fram bókun þar sem hann lýsti andstöðu við tillöguna. Hann benti á að íbúar Grafarvogs hefðu ítrekað lýst yfir skýrri andstöðu við þéttingaráform innan hverfisins.
Íbúar hafa einnig lýst áhyggjum af því að samgönguleiðir inn og út úr hverfinu séu sprungnar og að fjölgun íbúa myndi auka álagið enn frekar. Í bókuninni segir að mikilvægt sé að virða vilja nærumhverfisins og horfa fremur til uppbyggingar á nýjum svæðum þar sem hægt er að byggja upp húsnæði með betri heildarsýn, sterkari innviðum og minni neikvæðum áhrifum á gróin hverfi.
Sjá nánar: mbl.is
