Nýtt baðlón og lifandi miðbær á Vatnsnesi
Metnaðarfull uppbyggingaráform á Vatnsnesi, undir heitinu Kef Center, hafa verið kynnt. Verkefnið felur í sér nýtt baðlón og miðbæjarsvæði sem sameinar afþreyingu, verslun og mannlíf.
Steinþór Jónsson, eigandi Hótels Keflavíkur, hefur kynnt metnaðarfull uppbyggingaráform á Atvinnu- og framkvæmdaþingi Reykjanesbæjar undir heitinu Kef Center.
Verkefnið miðar að því að skapa lifandi miðbæjar- og þjónustukjarna á Vatnsnesinu sem mun sameina afþreyingu, verslun, veitingastaði og mannlíf á einum stað. Meginuppistaðan er að nýta strandlengjuna og tengja saman staðbundna þjónustu og ferðaþjónustu á nýstárlegan hátt.
Áætlað er að reisa glæsilegt baðlón norðan megin á Vatnsnesi. Lónið mun nýta náttúrulega kletta, strandlengju og útsýni yfir sjóinn og er því ætlað að verða mikið aðdráttarafl fyrir heimamenn og ferðamenn.
Svæðið er staðsett mjög þétt við höfnina og miðbæinn, sem skapar einstakar aðstæður til að tvinna saman komur skemmtiferðaskipa, verslun og afþreyingu á einum bletti.
Uppbyggingin er þegar hafin að hluta til. KEF-fjölskyldan hefur tryggt sér aðstöðulóðir á svæðinu, þar á meðal Olís-lóðina og lóð við Framnesveg. Hótel Keflavík hefur verið stækkað og Kef Spa & Fitness heilsuræktin hefur opnað. Þá hefur Vatnsneshúsið verið tekið í gegn.
Steinþór benti á að undirbúningur hefði staðið yfir í þrjú ár og lagði áherslu á mikilvægi þess að hefja framkvæmdir í áföngum og vinna með öllum lóðarhöfum á svæðinu til að gera heildarsýnina að veruleika.
→ Lesa upprunaleg frétt á vef Víkurfréttir
Heimild: Víkurfréttir