Nýr starfshópur um innviði á Reykjanesi
Eyjólfur Ármannsson, innviðaráðherra, hefur skipað starfshóp sem ætlað er að greina mikilvæga innviði á Reykjanesskaga og leggja fram tillögur að forgangsröðun mótvægisaðgerða gegn náttúruvá. Starfshópurinn mun skila lokaskýrslu fyrir lok maí 2027.
Verkefni hópsins felst í að halda áfram fyrri vinnu við greiningu innviða og mótvægisaðgerða á svæðinu. Tilgangurinn er að undirbúa langtímastefnumörkun, öfugt við skammtímaviðbragðsáætlanir sem falla undir almannavarnir. Hópurinn er skipaður fulltrúum frá innviðaráðuneytinu, dómsmálaráðuneytinu, umhverfis-, orku- og loftslagsráðuneytinu, Háskóla Íslands, Veðurstofu Íslands og almannavarnadeild ríkislögreglustjóra.
Í tilkynningu frá innviðaráðuneytinu kemur fram að starfshópurinn muni safna og yfirfara upplýsingar, meta nauðsynlega innviði á Reykjanesskaga vestan Kleifarvatns, greina mótvægisaðgerðir og kostnað þeirra, og gera tillögu að forgangsröðun. Einnig verður metin þörf á lagabreytingum til að styðja við markmið verkefnisins.
Sjá nánar: mbl.is
