Ný flotbryggja fyrir Björgunarskipið Sigurvin komin til Siglufjarðar

Ný flotbryggja fyrir Björgunarskipið Sigurvin er komin á flot á Siglufirði, en hún kom til bæjarins 24. september síðastliðinn. Undirbúningur að uppsetningu bryggjunnar hófst fyrir helgi og er henni nú komið á flot. Enn á þó eftir að festa bryggjuna og ganga endanlega frá búnaði hennar.

JE Vélaverkstæði mun sjá um festingu flotbryggjunnar í samstarfi við Köfunarþjónustuna ehf. Fingurnir sem festir verða við flotbryggjuna voru smíðaðir af SR Vélaverkstæði. Ekki liggur fyrir hvenær verkinu verður lokið.

Framkvæmda-, hafna- og veitunefnd Fjallabyggðar ræddi í maí um að koma flotbryggju fyrir við vesturkant innri hafnarinnar á Siglufirði. Markmiðið er að tryggja Sigurvini fast og öruggt viðlegupláss, þar sem ekki er hætta á að aðrir bátar leggist utan á björgunarskipið. Breytingin gæti jafnframt losað um pláss við núverandi flotbryggju og skapað fleiri viðlegupláss fyrir smærri báta.

→ Lesa upprunaleg frétt á vef Trölli

Heimild: Trölli