Notuðu sprengju til að skemma raforkulínu
Skemmdarverk voru unnin á raforkulínum nærri orkuveri í Þýskalandi í dag þar sem sprengju var beitt. Truflanir urðu á rafmagnsdreifingu en allar línur eru komnar í fulla notkun á ný.
Skemmdarverk voru unnin á rafmagnslínum nærri orkuveri í Jaenschwalde í Þýskalandi í dag. Sprengja sprakk á vettvangi og fundust aðrar ósprungnar.
Af þeim sökum urðu nokkrar truflanir á rafmagnsdreifingu, en sprengingin hafði ekki mikil áhrif. Samkvæmt tilkynningu frá orkuverinu eru allar rafmagnslínur komnar í fulla notkun á ný.
LEAG, sem rekur orkuverið, greindi frá því í tilkynningu að ráðist hefði verið á starfsemi fyrirtækisins í Preilack. Rafmagn sem framleitt er í Jaenschwalde fer um stöðina í Preilack.
Samkvæmt fjölmiðlum voru sprengjurnar ekki framleiddar í verksmiðju heldur settar saman af einstaklingum og komið fyrir við tengivirki.
Heimild: RÚV