Norræna gengur nú fyrir rafmagni í höfn á Seyðisfirði
Landtengingarbúnaður sem gerir ferjunni Norrænu kleift að ganga fyrir rafmagni í höfn á Seyðisfirði hefur verið tekinn í notkun. Verkefnið miðar að því að draga úr mengun á meðan ferjan dvelur í höfn.
Landtengingarbúnaður sem gerir ferjunni Norrænu kleift að ganga fyrir rafmagni í höfn á Seyðisfirði var formlega tekinn í notkun í dag. Ferjan siglir þó áfram á olíu en raftengingin er fyrst og fremst til að minnka mengun á meðan hún er í höfn.
„Þetta er mikill gleðidagur, því núna liggur Norræna hér í höfn á Seyðisfirði og það heyrist ekkert í henni af því að það þurfa engar vélar að vera í gangi,“ segir Dagmar Ýr Stefánsdóttir, sveitarstjóri Múlaþings.
Á veturna er Norræna í höfn tvo daga í viku en á sumrin stoppar hún í tvo klukkutíma.
Dagmar Ýr segir að þetta sé fyrsta skrefið í raftengingu hafna Múlaþings. „Nú þurfum við að skoða hvort við getum haldið áfram. Það er auðvitað það sem við viljum, við fáum mikið af skemmtiferðaskipum til okkar, en þau geta ekki notað þessa tengingu, það þarf stærri og meiri búnað fyrir það.“
Alls hefur verkefnið tekið um fimm til þrjú ár og kostað sveitarfélagið tæplega 100 milljónir. „Bara þetta litla verkefni að raftengja Norrænu kostaði 95 milljónir og við þurfum að fara í samstarf við ríkið um það hvernig við ætlum að fjármagna raftengingu hafna hringinn í kringum landið, þannig að það er stóra verkefnið fram undan að halda áfram.“
Heimild: RÚV