Niðurstöður um fýsileika Eyjaganga væntanlegar fyrir árslok
Kjarnaborunum vegna mögulegra Eyjaganga lauk á Landeyjasandi um helgina, en Völuberg hefur umsjón með borununum. Þar með hefur tekist að safna öllum nauðsynlegum gögnum til að rannsaka fýsileika jarðganga milli lands og Eyja. Jarðfræðilegar aðstæður á Landeyjasandi eru ekki mjög frábrugðna
Kjarnaborunum vegna mögulegra Eyjaganga lauk á Landeyjasandi um helgina, en Völuberg hefur umsjón með borununum. Þar með hefur tekist að safna öllum nauðsynlegum gögnum til að rannsaka fýsileika jarðganga milli lands og Eyja. Jarðfræðilegar aðstæður á Landeyjasandi eru ekki mjög frábrugðnar þeim í Vestmannaeyjum, að sögn Benedikts Óskars Steingrímssonar, jarðfræðings hjá Völubergi.
Fyrr í sumar lauk kjarnaborunum við Klifið í Vestmannaeyjum, auk hafsbotns- og hljóðendurvarpsmælinga milli lands og Eyja. Jarðfræðiskýrsla um allar rannsóknirnar verður unnin á næstu vikum.
Heildarkostnaður við boranirnar nemur um 200 milljónum króna. Það fjármagn kemur frá sveitarfélögum í Vestmannaeyjum og á Suðurlandi, ásamt fyrirtækjum um land allt, sagði Haraldur Pálsson, framkvæmdastjóri Eyjaganga ehf., fyrr í sumar.
Verkfræðistofan Efla og Völuberg munu greina gögnin í sameiningu á næstu mánuðum. Gert er ráð fyrir að niðurstöður um tæknilegar og fjárhagslegar forsendur jarðgangagerðar liggi fyrir fyrir árslok. Norska ráðgjafafyrirtækið Norconsult vinnur einnig sjálfstætt fýsileika- og kostnaðarmat.
→ Lesa upprunalegu fréttina á RÚV
Heimild: RÚV