Malbika hluta Reykjanesbrautar á morgun
Vegagerðin hefur tilkynnt um malbikun á Reykjanesbraut á morgun, föstudag. Vegurinn verður þrengdur í eina akrein og lokun verður á innkeyrslu frá Vatnsleysustrandarvegi.
Vegagerðin hefur tilkynnt að unnið verði að malbikun á Reykjanesbraut í austurátt á morgun, föstudaginn 19. maí. Framkvæmdirnar fara fram skammt frá afleggjaranum inn á Vatnsleysuströnd.
Vegfarendur þurfa að gera ráð fyrir að vegurinn verði þrengdur í eina akrein fram hjá vinnusvæðinu. Einnig verður lokað inn á Reykjanesbraut frá Vatnsleysustrandarvegi meðan á framkvæmdum stendur. Gert er ráð fyrir að vinnan hefjist klukkan átta í fyrramálið og standi til klukkan átta annað kvöld.
Vegagerðin minnir á að víða um land standi nú yfir viðgerðir og aðrar vegaframkvæmdir. Vegfarendur eru beðnir um að sýna aðgát og tillitssemi í umferðinni.
Heimild: RÚV