Malbík komið á 2 km kafla á Öxnadalsheiðinni
Tæplega tveggja kílómetra kafli á Öxnadalsheiði hefur verið malbikaður. Framkvæmdin er hluti af átaksverkefni Vegagerðarinnar.
Malbikun Akureyrar hefur lokið við að malbika tæplega tveggja kílómetra kafla á Öxnadalsheiði, milli Skagafjarðar og Eyjafjarðar.
Framkvæmdin fór fram dagana 25. og 26. ágúst við góðar aðstæður og er hluti af átaksverkefni Vegagerðarinnar sem miðar að því að leggja malbik á vegi þar sem álag er mikið.
Nýi malbikaði kaflinn er í beinu framhaldi af rúmlega þriggja kílómetra kafla sem malbikaður var á Öxnadalsheiði á síðasta ári. Á þessum vegkafla er mikið álag vegna umferðar, viðhalds og vetrarþjónustu, auk þess sem bikblæðingar í klæðingu hafa verið tíðar. Með malbikun er dregið úr hættu á slíkum skemmdum.
Umferð var stýrt um vinnusvæðið meðan á framkvæmdum stóð, enda er umferð um Öxnadalsheiði mikil yfir sumartímann og hjáleiðin löng.
→ Lesa upprunaleg frétt á vef Feykir
Heimild: Feykir