Viðbragðsæfing í Sultartangastöð

Öryggi starfsmanna á framkvæmdasvæðum Landsvirkjunar er ávallt í forgangi og til að tryggja sem best viðbrögð við óvæntum atvikum var nýlega efnt til umfangsmikillar æfingar í aðrennslisgöngum Sultartangastöðvar. Þessar framkvæmdir eru hluti af stærra verkefni Landsvirkjunar sem miðar að því að styrkja innviði raforkukerfisins og tryggja áreiðanleika orkuöflunar til framtíðar.

Æfingin var sérstaklega hönnuð til að líkja eftir slysi innst í göngunum, á því svæði þar sem verktakinn LNS vinnur að framkvæmdum. Útkall var sent í gegnum viðbragðsaðila 112, stjórnstöðvar Landsvirkjunar og Heilbrigðisstofnunar Suðurlands (HSU). Viðbragðskerfi á verkstað fóru í kjölfarið í gang og starfsmenn brugðust við samkvæmt skilgreindum ferlum í öryggis- og viðbragðsáætlunum verkefnisins.

Viðbragðsaðili frá HSU kom á vettvang og fékk fylgd inn í göngin að hinum sviðsetta slysstað. Þar var æft hvernig staðið skuli að fyrstu viðbrögðum, samskiptum, aðgengi viðbragðsaðila og rýmingu við aðstæður sem líktust raunverulegu slysi í neðanjarðarmannvirki. Slíkar aðstæður geta verið afar krefjandi fyrir viðbragðsaðila vegna takmarkaðs rýmis og flókins umhverfis.

Æfingin var samhæfð milli Landsvirkjunar, LNS og HSU. Arnar Páll Gíslason, verkefnastjóri umbóta og öryggis hjá Landsvirkjun, stýrði æfingunni. Einnig komu að henni Erlingur Jónsson og Lárus Þorsteinsson frá LNS, Atli Ingimarsson frá Völubergi verkfræðistofu og Sturla frá HSU sem viðbragðsaðili. Samstarf þessara aðila skiptir sköpum á framkvæmdasvæði þar sem unnið er í löngum aðrennslisgöngum og aðstæður geta verið flóknar. Með æfingunni var meðal annars reynt á boðleiðir, hlutverkaskiptingu, aðgengi að vettvangi og samskipti milli þeirra sem koma að viðbragði.

Að æfingu lokinni var farið yfir framkvæmdina, hvað hefði gengið vel og hvar mætti skerpa enn frekar á verklagi. Niðurstöður verða teknar saman í skýrslu og nýttar til að styrkja öryggisferla enn frekar á verkstaðnum. Mikil áhersla hefur verið lögð á vandaðan undirbúning þessara framkvæmda og er ljóst að lærdómur af slíkum æfingum er ómetanlegur til að tryggja öryggi allra sem starfa við þau krefjandi verkefni sem framundan eru.

Heimild: isor.is