Öflug þátttaka á heimsþingi jarðvarma

Ísland hefur lengi verið í fararbroddi í nýtingu jarðvarma og það sannaðist enn og aftur á heimsþingi jarðvarma, World Geothermal Congress, sem fram fór í Calgary í Kanada í byrjun júní. Fulltrúar Landsvirkjunar voru áberandi á þinginu og sýndu fram á mikilvægi Íslands sem leiðandi þjóðar á þessu sviði.

Bjarni Pálsson, framkvæmdastjóri vinds og jarðvarma hjá Landsvirkjun, gegnir sem kunnugt er embætti forseta Alþjóða jarðvarmasamtakanna. Það er táknrænt fyrir stöðu Íslands að landið var gestgjafi þingsins („co-host nation“) ásamt Kanada, sem undirstrikar enn frekar þátt okkar í alþjóðlegu samstarfi um jarðvarma.

Íslandsstofa stóð fyrir glæsilegri dagskrá sem sýndi fram á framlag Íslands til loftslagsmála. Þar var m.a. haldinn viðburðurinn „Loftslagsframtíð okkar“ („Our Climate Future“), þar sem Bjarni Pálsson sat í pallborði og deildi innsýn í framtíðarlausnir í orkumálum.

Sérfræðingar Landsvirkjunar voru virkir í umræðum um mikilvæg tæknileg málefni. Alma Stefánsdóttir og Jónas Ketilsson kynntu vísindagreinar um gasmeðhöndlun og stýrðu fjölþjóðlegri vinnustofu um gas í tengslum við jarðvarmavinnslu. Þessi vinnustofa, á vegum jarðhitahóps Alþjóðlegu orkumálastofnunarinnar (International Energy Agency - Geothermal), hafði það markmið að móta stefnu til næstu ára varðandi skrásetningu og samræmingu losunar gass frá jarðvarmaverum milli landa. Þetta er mikilvægt skref í átt að sjálfbærari nýtingu jarðvarma og minni umhverfisáhrifum.

Alls voru 15 fulltrúar Landsvirkjunar á ráðstefnunni og kynntu þeir fjölda vísindagreina og héldu vinnustofur. Hilmar Már Einarsson og Sigurður Óli Guðmundsson kynntu til dæmis nýjungar í tækni við Þeistareyki með kynningu á toppvélinni. Anette K. Mortensen fjallaði um mikilvægt efni, náttúruvá og jarðvarmanýtingu, en Jónas Ketilsson kynnti fyrstu fjölþjóðlegu greinina sem tekur saman náttúrulega losun og losun frá vinnslu jarðhitaþjóða. Greinin, sem var skrifuð í samstarfi við IEA Geothermal, varpaði ljósi á ósamræmi í regluverki og aðferðafræði losunarbókhalds.

Alma Stefánsdóttir kynnti grein um hönnun vinnslurása jarðvarmavirkjana og hvernig hún hefur bein áhrif á tæknilegt flækjustig og möguleika til hagnýtingar eða endurniðurdælingar jarðhitagasa. Julia Lee Reimer kynnti meðal annars hvernig hægt er að nota efnasamsetningu einstakra borhola til að meta tengsl milli sprunga við Þeistareyki. Þessi fjölbreytta þátttaka sýnir fram á djúpa sérfræðiþekkingu Landsvirkjunar og framlag hennar til framþróunar í jarðvarmaiðnaði á heimsvísu.

Heimild: isor.is