E-Ship 1 komið til Þorlákshafnar

Mikilvægur áfangi í uppbyggingu Vaðölduvers Landsvirkjunar náðist í vikunni þegar hið sérhannaða flutningaskip ENERCON E-Ship 1 lagðist að bryggju í Þorlákshöfn. Skipið er lykilþáttur í flutningum á risastórum vindmylluhlutum sem eru nauðsynlegir fyrir stækkun Vaðölduvers, stærsta vindorkuvers landsins, en framkvæmdir þykja í heildina vera mikilvægt skref í átt að aukinni sjálfbærni í orkumálum Íslands.

E-Ship 1 er enginn venjulegur flutningabátur. Það er sérstaklega hannað til að flytja stóra vindmylluhluta og getur flutt fjórar vindmyllur í einu, sem er meira en tvöfalt meira en hefur borist í hverri skipaferð hingað til. Þetta flýtir verulega fyrir uppbyggingunni á Vaðölduveri og tryggir að framkvæmdir haldi áætlun.

Það sem gerir E-Ship 1 enn merkilegra er nýstárleg tækni sem það nýtir til að drífa sig áfram. Á þilfarinu eru fjórir háir Flettner-rótorar sem nýta vindorku til að aðstoða við siglinguna. Þessi tækni byggir á svokölluðum Magnus-áhrifum, þar sem snúningssívalningar skapa kraft sem styður við siglinguna og minnkar þannig eldsneytisnotkun. Fyrir vikið notar skipið allt að fjórðungi minni olíu en skip af sambærilegri stærð, sem er mikilvægt skref í átt að umhverfisvænni flutningum.

Flutningar á vindmylluhlutum frá Þorlákshöfn að framkvæmdasvæðinu hafa staðið yfir frá því í byrjun maí og ganga vel. Byrjað er að reisa fyrstu vindmyllurnar og er áætlað að fyrri fjórtán þeirra verði farnar að vinna raforku inn á flutningskerfið í haust. Seinni helmingurinn verður settur upp á næsta ári og er gert ráð fyrir að Vaðölduver verði komið í fullan rekstur seinni hluta árs 2027. Þessar framkvæmdir eru mikilvægur liður í því að tryggja stöðugt og sjálfbært orkuöryggi fyrir Ísland.

Heimild: isor.is