Loka hluta Laugardalslaugar og undirbúa niðurrif stúkunnar
Hluti af Laugardalslaug verður lokaður um ófyrirséðan tíma vegna slæms ástands stúkunnar við sundlaugina. Reykjavíkurborg hefur ákveðið að takmarka aðgang að svæðum við stúkuna vegna áhættumats.
Fimm pottum sunnan við stúku Laugardalslaugar, ásamt gufubaði og tveimur af fjórum sérklefum, verður lokað um ófyrirséðan tíma frá og með deginum í dag. Ástæðan er nýtt áhættumat vegna stúkunnar sem bendir til þess að ástand mannvirkisins sé mjög bágborið. Skemmdir í steypu og burðarvirki, sem rekja má til alkalí- og tæringaráhrifa, kalla á tafarlausa lokun skilgreindra svæða.
Öll þjónusta og viðvera innan stúkunnar verður færð annað og umferð umhverfis hana takmörkuð. Samhliða því að tryggja öryggi kringum stúkuna er verið að undirbúa niðurrif á byggingarhlutum sem taldir eru skapa áhættu. Úttektir benda ekki til þess að heildarhrun stúkunnar sé yfirvofandi, en metnar eru líkur á að brotnað geti úr henni.
Bágborið ástand stúkunnar hefur verið þekkt lengi. Árið 2019 var fjallað um málið í fréttum, en þá hafði stúkunni ekki verið haldið við í tæp tuttugu ár. Forstöðumaður laugarinnar nefndi þá mikinn kostnað sem ástæðu. Árið 2024 gerði Verkfræðistofa Reykjavíkur úttekt á ástandi stúkunnar þar sem greint var burðarþol áhorfendapalla og skyggnis. Í úttektarskýrslunni kom fram að glöggt mátti sjá útfellingar vegna rakastreymis í gegnum plötur stúkunnar. Mat höfunda skýrslunnar var þá að þrátt fyrir skerta burðargetu væri ekki hætta á hruni, en að hættulegt gæti verið að umgangast mannvirkið.
Á árum áður var stúkan þó mikið notuð, bæði til að fylgjast með sundkeppni og til að njóta sólarinnar, eins og sést á myndefni frá árinu 1974.
Heimild: RÚV