Loftkæling orðin að pólitísku bitbeini í hitabylgjunni
Hitabylgja í Frakklandi hefur leitt til pólitískrar deilu um loftkælingu, þar sem stjórnmálamenn skiptast á skoðunum um hvort hún sé nauðsynleg lausn eða óæskileg vegna umhverfisáhrifa.
Nýtt hitamet var slegið í Frakklandi í nótt þegar meðalhiti landsins náði 22 gráðum á Celsius. Gamla metið, 21,6 gráður, var sett aðfaranótt þriðjudags. Í gær var annað met slegið þegar hitinn í París mældist 40,9 gráður, sem er mesti hiti frá upphafi mælinga í borginni. Stjórnvöld í Frakklandi, og víðar í Evrópu, hafa gefið út rauðar viðvaranir vegna hitabylgjunnar sem hefur haldið álfunni í heljargreipum undanfarna daga. Afleiðingar hitabylgjunnar og leiðir til að fást við hana hafa orðið að pólitísku bitbeini í Frakklandi.
Deilan snýst um loftkælingu, sem er af skornum skammti í Frakklandi, rétt eins og í flestum öðrum ríkjum Evrópu. Aðeins um fjórðungur bygginga í Frakklandi er með loftkælingu og langflest sjúkrahús og skólar eru án þessa tækjabúnaðar. Þetta er ein ástæða þess að þúsundum skóla í Frakklandi var lokað í upphafi vikunnar og nemendum sagt að vera heima.
Marine Le Pen, leiðtogi Þjóðfylkingarinnar, hefur lofað loftkælingu nái hún kjöri sem forseti Frakklands. „Það er fáránlegt að fólk sé að deyja úr hita,“ sagði hún fyrr í vikunni og bætti við: „Ef ég næ kjöri sem forseti Frakklands mun ég setja á laggirnar víðtæka áætlun um loftkælingu, og byrja á byggingum þar sem viðkvæmasta fólkið heldur til; sem eru sjúkrahús, elliheimili og skólar.“
Jean Luc Melenchon, leiðtogi vinstri flokksins La France Insoumise og líklegur keppinautur Le Pen um forsetaembættið, svaraði þessum skilaboðum með orðunum: „Kemur ekki til greina.“ Hann bætti við: „Ef við setjum upp loftkælingu alls staðar, þá eykur það bara skaðann,“ og átti þar væntanlega við áhrifin af aukinni orkunotkun á loftslagsbreytingar. Gamalgróin andstaða gegn loftkælingu, líkt og annars staðar í Evrópu, virðist þó vera að molna.
Heimild: RÚV