Reitir ráða framkvæmdastjóra eignaþróunar til að leiða umbreytingar og framkvæmdir

Reitir hf. hafa tilkynnt um breytingar á framkvæmdastjórn félagsins með ráðningu Kristófers Þórs Pálssonar í nýtt hlutverk sem framkvæmdastjóri eignaþróunar. Ráðningin endurspeglar aukna áherslu Reita á þróun og framkvæmdir innan núverandi eignasafns, sem og leit að nýjum tækifærum í eignaflokkum.

Kristófer mun hafa yfirumsjón með umbreytingarverkefnum innan eignasafnsins, greina möguleika á útvíkkun í nýja eignaflokka og móta langtímastefnu fyrir eignir félagsins. Hann mun vinna þvert á svið og í samstarfi við viðskiptavini og aðra hagaðila að fjölbreyttum verkefnum.

Kristófer hefur starfað hjá Reitum í yfir áratug og býr yfir víðtækri þekkingu á fasteignamarkaði, þróun, greiningum og fjárfestingum. Hann hefur áður gegnt stöðum sem framkvæmdastjóri fjárfestinga, greininga og viðskiptaþróunar, auk framkvæmdastjóra útleigusviðs.

Guðni Aðalsteinsson, forstjóri Reita, segir að aukin tækifæri séu til að þróa og umbreyta eignum innan hins víðfeðma eignasafns Reita, sem telur tæplega 500.000 fermetra í 150 fasteignum. Með þessari breytingu er félagið betur í stakk búið til að nýta ný tækifæri og breytta nýtingu eigna, auk vaxtar í nýjum eignaflokkum og uppbyggingarverkefnum.