Félagsbústaðir: Fjárhagsáætlun gerir ráð fyrir fjölgun íbúða og fjárfestingum
Félagsbústaðir hf. hafa samþykkt fjárhagsáætlun fyrir árið 2027 og langtímaáætlun til 2031, sem gerir ráð fyrir áframhaldandi uppbyggingu félagslegs leiguhúsnæðis í Reykjavík.
Stjórn Félagsbústaða hf. hefur samþykkt fjárhagsáætlun fyrir árið 2027 og langtímaáætlun fyrir árin 2028 til 2031, sem endurspeglar áherslu á fjárhagslega sjálfbæran rekstur samhliða uppbyggingu félagslegs leiguhúsnæðis í Reykjavík. Áætlunin gerir ráð fyrir að veltufé frá rekstri standi undir afborgunum langtímalána og að rekstur félagsins skapi svigrúm til viðhalds og hóflegrar stækkunar eignasafnsins.
Fyrir árið 2027 eru rekstrartekjur áætlaðar 8.518 milljónir króna, sem er 6,7% aukning frá útkomuspá ársins 2026, og byggir tekjuvöxturinn á verðlagsbreytingum og 2,7% aukningu í umfangi starfseminnar vegna fjölgunar íbúða. Rekstrargjöld eru áætluð 4.844 milljónir króna, þar sem rekstur og viðhald eignasafnsins vegur þyngst.
Áætlað er að íbúðum félagsins fjölgi um 60 árið 2027, en stækkun eignasafnsins mun verða með kaupum í nýbyggingum samkvæmt kaupréttarsamningum, kaupum á almennum markaði og uppbyggingu íbúðakjarna. Fjárfestingar ársins eru áætlaðar 3.397 milljónir króna og er fjármögnun þeirra áætluð með stofnframlögum, eiginfjárframlögum og lánsfé. Gjaldfært viðhald er áætlað 2.078 milljónir króna. Eiginfjárhlutfall er áætlað 52,3% í árslok 2027 og gert er ráð fyrir að það hækki í 54,8% árið 2031.