Kallað eftir tafarlausum öryggisaðgerðum í Kambaskriðum

Bæjarráð Fjarðabyggðar hefur lýst yfir miklum áhyggjum af ástandi vegarins um Kambaskriður. Endurtekið grjóthrun skapar hættu fyrir vegfarendur og því skorar bæjarráð á Vegagerðina og innviðaráðuneytið að ráðast tafarlaust í bráðabirgða- og öryggisaðgerðir á svæðinu. Meðal annars er óskað eftir grjóthrunsvörnum og reglubundnu eftirliti.

Vegurinn um Kambaskriður er mikilvæg samgönguleið milli byggðarkjarna í Fjarðabyggð og þar fer meðal annars fram daglegur skólaakstur. Ábendingar frá skólaráði Breiðdals- og Stöðvarfjarðarskóla um öryggi á þessari leið voru teknar til skoðunar af bæjarráði síðastliðinn vetur.

Endurbætur á vegkaflanum eru á samgönguáætlun en ekki er gert ráð fyrir að varanlegum framkvæmdum verði lokið fyrr en eftir 2030. Bæjarráð telur óásættanlegt að bíða eftir þeim framkvæmdum án þess að ráðist verði í fyrirbyggjandi aðgerðir til að tryggja öryggi og ásættanlegt ástand vegarins fram að varanlegri endurbyggingu.

→ Lesa upprunaleg frétt á vef Fjarðabyggð

Heimild: Fjarðabyggð