Íslensk þekking getur hraðað uppbyggingu jarðhita í Evrópu

Árni Magnússon, framkvæmdastjóri ÍSOR (Íslenskar orkurannsóknir), hefur lagt áherslu á að verðmætasta framlag Íslands til Evrópu sé ekki jarðfræði þess, heldur þekking og reynsla. Þetta kom fram í viðtali við CE Energy News í tengslum við 4. jarðhitafundinn í Búdapest, þar sem Árni flutti einnig erindi um hvernig reynsla Íslands getur nýst Evrópu í aukinni nýtingu jarðhita. Fundurinn, sem haldinn var í fjórða sinn, safnaði saman fulltrúum stjórnvalda, orkugeirans og sérfræðingum til að ræða tækifæri og áskoranir í frekari jarðhitaþróun í Evrópu. Árni benti á að jarðhiti getur stuðlað að auknu orkuöryggi og langtímastöðugleika. Reynsla Íslands sýnir hvernig markviss stefnumótun, rannsóknir og þekkingaruppbygging geta umbreytt orkunotkun. Fyrir tæpri öld var Ísland að mestu háð kolum og olíu, en í dag hitar jarðhiti yfir 90% heimila landsins og stendur fyrir tæpum 30% af raforkuframleiðslu. Í viðtalinu við CE Energy News undirstrikaði Árni að jarðhiti er ekki bundinn við eldfjallasvæði. Jarðhitaauðlindir eru til staðar víða í Evrópu og hægt er að nýta þær til hverfahitunar, í landbúnaði, fiskeldi og iðnaði, auk raforkuframleiðslu þar sem aðstæður eru heppilegar. Árangur Íslands byggir ekki aðeins á hagstæðum jarðfræðilegum skilyrðum heldur á áratuga uppbyggingu þekkingar og reynslu í jarðhitaleit, borunum, mati á jarðhitakerfum og sjálfbærri auðlindastýringu. Sú reynsla getur stutt jarðhitaverkefni í Evrópu. Árni lagði einnig áherslu á mikilvægi þess að draga úr áhættu á fyrstu stigum verkefna með ítarlegum rannsóknum, skýrum regluverki og viðeigandi áhættuskiptingu. Markmiðið er ekki að útrýma áhættu heldur að stjórna henni.

Heimild: isor.is