IDDP-3: Stærsta tækifæri jarðhitans til framtíðar á Íslandi
Orkuveitan, móðurfélag Orku náttúrunnar, leiðir þriðja hluta IDDP verkefnisins í samstarfi við Umhverfis-, orku- og loftslagsráðuneytið, Landsvirkjun og HS Orku. Verkefnið snýst um að þróa tækni til að virkja ofurheitan jarðhita, sem gæti aukið raforkuframleiðslu án þess að stækka vinnslusvæði.
IDDP-3 verkefnið er lykilskref í Djúpnýtingarvegferð Orkuveitunnar og hluti af stærri sýn um að opna nýjan kafla í nýtingu jarðhita. Markmiðið er að prófa nýjar tæknilausnir og kanna hvernig megi nýta ofurheitan jarðhita á öruggan og hagkvæman hátt til framtíðar, en hitastig fer yfir 350–400°C.
Fyrir Orku náttúrunnar gæti þetta þýtt aukna raforkuframleiðslu án þess að stækka þurfi vinnslusvæði, minni þörf á að bora nýjar holur og meiri sveigjanleika í nýtingu auðlindarinnar. Það myndi auka rekstraröryggi Nesjavalla- og Hellisheiðarvirkjunar og þannig orkuöryggi samfélagsins til lengri tíma.
Verkefnið er sérstaklega mikilvægt á tímum þar sem eftirspurn eftir endurnýjanlegri orku fer vaxandi og samfélagið kallar eftir bæði auknu framboði og ábyrgri nýtingu náttúruauðlinda.
Heimild: on.is