Íbúðaframkvæmdir dragast saman og spár fyrir 2027 versna

Íbúðaframkvæmdir á landinu hafa dregist verulega saman samkvæmt nýrri septembertalningu HMS. Alls voru 6.216 íbúðir í byggingu í september, sem er fækkun um 772 íbúðir, eða 11%, frá mars. Frá september í fyrra hefur íbúðum í byggingu fækkað um rúm 5%.

Nýjum framkvæmdum hefur fækkað mest. Frá marstalningu HMS hófust framkvæmdir við 772 íbúðir á landinu öllu, sem er minnsti fjöldi frá upphafi talninga stofnunarinnar. Þetta er 56% færri en á milli síðustu tveggja talninga og 48% fækkun miðað við sama tímabil í fyrra.

Horfur fyrir framboð nýrra íbúða árið 2027 hafa versnað verulega. HMS gerir nú ráð fyrir að um 2.300 íbúðir verði fullbúnar árið 2027, samanborið við spá um 2.800 til 3.700 íbúðir í mars. Fyrir árið 2028 er nú gert ráð fyrir 1.900 til 2.800 fullbúnum íbúðum, en fyrri spá var 2.700 til 3.700.

HMS bendir á að mun fleiri íbúðaverkefni færist lítið eða ekkert áfram á milli talninga. Alls voru 2.374 íbúðir á sama framvindustigi í september og þær voru í mars, sem er 65% fjölgun á sex mánuðum. Þetta er vísbending um að hægt hafi á framgangi hluta verkefna í byggingu.