Gríðarleg menningarverðmæti í húfi verði hús með lágmyndum Gerðar rifið
Safnstjóri Gerðarsafns lýsir yfir miklum áhyggjum vegna fyrirhugaðra framkvæmda við Dugguvog 42, þar sem steypt lágmyndarverk eftir Gerði Helgadóttur er að finna á vesturvegg hússins. Áform eru uppi um að rífa húsið til að koma fyrir tímabundinni hjáleið vegna framkvæmda við Sæbrautarstokk.
Mikil menningarverðmæti eru í húfi verði húsið að Dugguvogi 42 rifið og byggingunni fargað, að mati Brynju Sveinsdóttur, safnstjóra Gerðarsafns. Á vesturvegg byggingarinnar eru steypt lágmyndarverk eftir listakonuna Gerði Helgadóttur, unnin á árunum 1971-1972.
Í bréfi frá Brynju Sveinsdóttur er gerð alvarleg athugasemd við áformin. Hún segir ótækt að byggingunni verði fargað fyrir tímabundna lausn fyrir umferð, en til stendur að rífa húsið til að koma fyrir tímabundinni hjáleið á meðan framkvæmdir við Sæbrautarstokk standa yfir. Borgarsögusafn hefur áður lagt til að byggingin hljóti vernd í rauðum flokki.
Safnstjórinn bendir á að færa þurfi sterkari rök fyrir þessari óafturkræfu framkvæmd. Verkið er talið fyrsta steinsteypta lágmyndin sem unnin er á byggingu í Reykjavík og er því ekki aðeins merkur hluti af listasögu þjóðarinnar heldur einnig sögu borgarinnar. Lágmynd Gerðar er órjúfanleg heild mannvirkisins þar sem form verksins eru steypt beint í bygginguna við gerð þess. Myndefni verksins er einnig beintengt byggingunni þar sem það vísar í upprunalega starfsemi hússins og svæðisins með formum fengnum úr iðnaði. Verkið hefur því ekki aðeins listsögulegt gildi heldur ber einnig atvinnusögu svæðisins vitni.
Heimild: RÚV