Greiðslubyrði enn þung í sögulegu samhengi
Greiðslubyrði nýrra húsnæðislána er enn þung í sögulegu samhengi, þrátt fyrir að óverðtryggð lán hafi orðið viðráðanlegri. Fasteignamarkaðurinn hefur verið kaldari á þessu ári en í fyrra.
Greiðslubyrði nýrra húsnæðislána, bæði verðtryggðra og óverðtryggðra, er enn þung í sögulegu samhengi. Þetta á sér stað þó að greiðslur af óverðtryggðum íbúðalánum hafi orðið viðráðanlegri á síðustu árum. Þetta má rekja til vaxtalækkana og launahækkana sem hafa verið meiri en íbúðaverðshækkanir.
Þetta kemur fram í nýrri mánaðarskýrslu Húsnæðis-, mannvirkja- og skipulagsstofnunar sem birt var í morgun.
Fasteignamarkaðurinn var kaldari á fyrri helmingi þessa árs en á sama tímabili í fyrra. Færri kaupsamningum vegna íbúðahúsnæðis hefur verið þinglýst í ár og fólk er lengur að selja íbúðir sínar en áður.
Heimild: RÚV