Gjaldtaka hafin við nýja brú yfir Hornafjarðarfljót

Sjálfvirk gjaldtaka hófst á miðnætti á nýrri brú yfir Hornafjarðarfljót, sem var tekin í notkun 24. júní. Stök ferð yfir brúna kostar nú 1.500 krónur. Veggjöldin eiga að standa undir hluta kostnaðar við framkvæmdina, rekstur og viðhald vegarins, að sögn Vegagerðarinnar.

Spölur ehf. sér um gjaldtökuna. Númeraplötur bíla sem aka yfir brúna eru myndaðar og reikningur sendur eigendum þeirra mánaðarlega. Vegfarendur þurfa ekki að skrá sig eða greiða um leið og ekið er um veginn.

Samkvæmt gjaldskrá Spalar og Vegagerðarinnar eru veitt afsláttarkjör á magnferðum. Ef farartæki sem vegur minna en 3,5 tonn ekur 2-5 ferðir á mánuði kostar hver ferð 950 krónur og fyrir 6-22 ferðir kostar ferðin 750 krónur. Hámarksgjald á mánuði er 18.350 krónur.

Brúin um Hornafjarðarfljót er fyrsta samvinnuverkefni Vegagerðarinnar með innviðafélaginu Göng og brú ohf., sem stofnað var í júní. Brúin yfir Ölfusá er næsta verkefni innviðafélagsins, en kostnaður við hana er metinn á 18 milljarða króna. Brúin yfir Hornafjarðarfljót kostaði 10 milljarða króna.

→ Lesa upprunalegu fréttina á RÚV

Heimild: RÚV