Framkvæmdir hefjast við hringveginn á Hvolsvelli

Framkvæmdir við endurbyggingu hringvegarins í gegnum Hvolsvöll hefjast í þessari viku. Markmið verkefnisins er að auka umferðaröryggi allra vegfarenda og bæta umferðarflæði í bænum.

Verkið nær yfir um 800 metra kafla á hringveginum, frá afleggjara að tengivirki Landsnets austur fyrir Dufþaksbraut. Samhliða endurbyggingu akbrautarinnar verða lagðir nýir göngu- og hjólastígar og gatnamótin við Hvolsveg og Hlíðarveg endurbætt.

Verktakafyrirtækið Þjótandi ehf. sér um framkvæmdina fyrir Vegagerðina, í samráði við Rangárþing eystra. Heildarverktími er áætlaður um eitt ár og á verkinu að vera að fullu lokið 1. september 2027.

Fyrsti áfanginn, sem unnið verður að fram í miðjan desember, felst einkum í jarðvegsskiptum og lagnavinnu utan núverandi vegar. Þegar líður á verkefnið á næsta ári verður farið í að malbika nýjar akreinar og færa umferðina yfir á þær til að hægt sé að ganga frá svæðinu sem nú er undir veginum.

Framkvæmdin mun hafa áhrif á daglegt líf íbúa, fyrirtækja og vegfarenda í hjarta bæjarins. Lögð verður rík áhersla á að halda röskun í lágmarki og verður verkið unnið í vel skipulögðum skrefum.

Þegar loka þarf fyrir tengingar við fyrirtæki á svæðinu, eins og Apótekarann, N1 og Krónuna, verða útbúnar bráðabirgðaleiðir á meðan og kappkostað að stytta lokunartíma eins og kostur er.

Íbúar og aðrir vegfarendur verða upplýstir um allar lokanir og hjáleiðir með góðum fyrirvara, bæði á vef sveitarfélagsins og á vef Vegagerðarinnar.

Allir eru beðnir um að sýna framkvæmdinni þolinmæði, virða merkingar og sýna sérstaka aðgát í nágrenni við vinnusvæðið næsta árið.

→ Lesa upprunaleg frétt á vef Rangárþing eystra

Heimild: Rangárþing eystra