Fjallabyggð sækir um FIFA Arena völl á Siglufirði

Fjallabyggð hefur samþykkt að sækja um byggingu á litlum knattspyrnuvelli á Siglufirði í tengslum við FIFA Arena verkefni FIFA og KSÍ. Markmið verkefnisins er að bæta aðstöðu barna og ungmenna til knattspyrnuiðkunar, sérstaklega á svæðum þar sem slík aðstaða er takmörkuð.

Bæjarstjórn Fjallabyggðar samþykkti umsóknina samhljóða á fundi sínum þann 17. september. Aðeins er gert ráð fyrir að tveir slíkir vellir verði reistir á Íslandi. Umsókn Fjallabyggðar verður unnin í samráði við Knattspyrnufélag Fjallabyggðar.

Í fundargerð bæjarstjórnar kemur fram að aðeins einn lítill sparkvöllur sé á Siglufirði, og nýr völlur myndi því bæta aðstöðuna verulega. Jafnframt er fyrirhugað að bæta aðstöðuna í Ólafsfirði með byggingu knatthúss.

Kostnaður sveitarfélagsins við framkvæmdina yrði óverulegur og fælist fyrst og fremst í gerð undirlags fyrir völlinn. Gert er ráð fyrir að fjárveiting vegna framkvæmdarinnar verði tekin fyrir við gerð fjárhagsáætlunar fyrir árið 2027. Ekki liggur enn fyrir hvort Fjallabyggð verði fyrir valinu í verkefninu.

→ Lesa upprunaleg frétt á vef Trölli

Heimild: Trölli