Eyjagöng fá alþjóðlegan sérfræðing í neðansjávargangagerð til liðs við sig

Eyjagöng ehf. hafa gert samstarfssamning við prófessor Eivind Grøv, sem er einn fremsti sérfræðingur heims á sviði neðansjávargangagerðar. Grøv mun gegna hlutverki tæknilegs ráðgjafa félagsins við undirbúning og hönnun fyrirhugaðra neðansjávarganga milli meginlands Íslands og Heimaeyjar. Eyjagöng ehf. er félag sem vinnur að undirbúningi og framgangi neðansjávarganga milli meginlands Íslands og Vestmannaeyja.

Eivind Grøv er aðalvísindamaður hjá norsku rannsóknarstofnuninni SINTEF og aðjúnkt við NTNU-háskólann í Þrándheimi. Hann hefur yfir 40 ára reynslu af jarðgangagerð og bergverkfræði. Grøv hefur áður starfað sem tæknilegur ráðgjafi Spalar hf. við hönnun og framkvæmd Hvalfjarðarganga á tíunda áratugnum. Þá var hann kallaður til sem óháður sérfræðingur í deilunefnd vegna Vaðlaheiðar- og Norðfjarðarganga. Í Færeyjum hefur hann verið ráðgjafi við gerð allra fjögurra neðansjávarganga sem þar hafa verið lögð og er nú ráðgjafi verkkaupa vegna Suðureyjarganganna, sem verða um 24,3 kílómetrar að lengd.

Haraldur Pálsson hjá Eyjagöngum ehf. segir að reynsla Eivinds Grøv af neðansjávargangagerð sé einstök á heimsvísu. Grøv mun starfa sem tæknilegur ráðgjafi Eyjaganga ehf. og veita umsagnir um hönnun, rannsóknir og önnur tæknileg atriði sem verkfræðistofur á vegum félagsins leggja fram.

→ Lesa upprunaleg frétt á vef DFS

Heimild: DFS