Eigið fé Arcus nálgast 31 milljarð – ÞG Verktakar með 69% tekjuaukningu

Fasteignaþróunarfélagið Arcus, í eigu Þorvalds Gissurarsonar, skilaði 3.207 milljóna króna hagnaði árið 2025. Heildarhagnaður, að teknu tilliti til matsbreytinga fasteigna, nam 3.990 milljónum króna. Tekjur samstæðunnar drógust saman um 20% milli ára og námu 13.201 milljón króna. Eignir Arcus voru bókfærðar á 82.619 milljónir króna í árslok 2025 og eigið fé nam 30.863 milljónum króna.

Systurfélagið ÞG Verktakar, sem einnig er í eigu Þorvalds Gissurarsonar, hagnaðist um 1.459 milljónir króna árið 2025, sem er veruleg aukning frá fyrra ári. Tekjur félagsins námu 16.292 milljónum króna og jukust um 69% milli ára. Eignir ÞG Verktaka voru bókfærðar á 10.346 milljónir króna og eigið fé nam 5.608 milljónum króna.

Meðal stærri verkefna ÞG Verktaka er ný Ölfusárbrú, en verksamningur um hana var undirritaður seint á árinu 2024. Áætlaður kostnaður við brúna er um 15,8 milljarðar króna og fjármagnar félagið framkvæmdirnar fram að afhendingu árið 2028. Árið 2025 fjármagnaði félagið sig meðal annars með 1,9 milljarða króna skuldabréfaútgáfu og gerði rammasamning um frekari skuldabréfaútgáfu allt að 12,6 milljörðum króna.

Sjá nánar: vb.is