Byggingaráformum fjölgar en íbúðum í byggingu fækkar á milli ára

Snörp aukning í byggingaráformum

Samkvæmt mælaborði HMS eru nú 6.177 íbúðir í byggingu á landinu, sem er svipaður fjöldi og í síðasta mánuði en 3,5% fækkun miðað við sama tíma í fyrra. Hins vegar fjölgaði skráðum byggingaráformum – íbúðum sem komnar eru með byggingarleyfi en þar sem framkvæmdir eru ekki hafnar – um heil 41% á milli mánaða. Þau fóru úr 560 í apríl í 787 í maí. HMS bendir þó á að þessi mikla hlutfallslega aukning telji aðeins 227 íbúðir og geti skýrst af örfáum eða einu stóru verkefni.

Útlit fyrir tæplega 3.000 fullbúnar íbúðir

Á fyrstu fjórum mánuðum ársins 2026 urðu 869 nýjar íbúðir fullbúnar, sem er 7% undir meðaltali síðustu sex ára. Íbúðauppbygging fer því hægt af stað í ár. Sögulega hafa fyrstu fjórir mánuðir ársins skilað um 30% af heildarfjölda ársins. Ef sú þróun gengur eftir má búast við að um 2.700 til 2.800 íbúðir verði fullbúnar á árinu 2026, sem er í takt við marstalningu HMS. Mikil óvissa ríkir þó enn, enda hafa markaðsaðstæður og framvinda stórra verkefna mikil áhrif.

Tækifæri til að vinna á íbúðaskuldinni

Á sama tíma sýna tölur Hagstofunnar að landsmönnum fjölgaði aðeins um 520 á fyrsta ársfjórðungi, sem bendir til áframhaldandi hóflegrar fólksfjölgunar eftir um 5.080 manna fjölgun árið 2025. Þetta er töluvert undir tíu ára meðaltali, sem er rúmlega 6.500 manns á ári.

Vegna þessarar hægari fólksfjölgunar og ágætrar uppbyggingar tókst að vinna lítillega á uppsafnaðri íbúðaskuld á síðasta ári, en HMS áætlar að hana vanti á bilinu 10 til 15 þúsund íbúðir. Haldist fólksfjölgun áfram hófleg og íbúðauppbygging kröftug, skapast góð tækifæri til að vinna enn frekar á þeirri skuld það sem eftir lifir árs.

Sjá nánar: hms.is