Borgarbyggð vill ekki að Alviðra fari í nýtingarflokk
Sveitarstjórn Borgarbyggðar leggst gegn því að Alviðra verði sett í nýtingarflokk í rammaáætlun vegna fyrirhugaðs vindorkuvers. Margvíslegar efasemdir eru nefndar, meðal annars um framlag til orkuöryggis og áhrif á landslag.
Sveitarstjórn Borgarbyggðar fjallaði í síðustu viku um áform um byggingu vindorkuvers við Alviðru. Ákvörðunin var tekin í tengslum við umsögn til faghóps 3 í rammaáætlun, sem flokkar virkjanakosti. Sveitarstjórnin leggst gegn því að Alviðra verði sett í nýtingarflokk að svo stöddu.
Sveitarstjórnin lýsir margvíslegum efasemdum um ágæti þess að vindorkuver rísi. Veruleg óvissa ríkir um raunverulegt framlag vindorkuversins til orkuöryggis landsins. Bent er á að vindorka sé breytilegur orkugjafi sem krefjist jöfnunarafls, orkugeymslu eða annarra lausna til að tryggja afhendingaröryggi.
Þessu til viðbótar telur sveitarstjórn að stórar vindmyllur geti haft veruleg áhrif á landslag og ásýnd. Þær verði sýnilegar á stóru landsvæði og geti haft áhrif á upplifun fólks af landslagi, náttúru og útivist langt út fyrir framkvæmdasvæðið sjálft.
Loks segir sveitarstjórnin að svo stórar framkvæmdir geti skapað ágreining milli ólíkra hagsmuna og haft áhrif á samfélagslega sátt. Mikilvægt sé að líta til þessa við ákvörðun um framtíð vindorkukosts við Alviðru.
Heimild: RÚV